I le amatalia ai i lenei vaiaso o se tasi o fonotaga tāua i vaega tau i le puipuiga i le vanimonimo ma matāupu tau i auala faatekonolosi i Niu Sila (Aerospace Summit 2025) na vaaia ai le silia ma le 100 tagata solo tetee, o ē e lagolagoina manatu ma matāupu ia Palesitina; ua o latou poloka le mafai ai ona aga’i atu sui auai o le fonotaga.
Ta’ua ua o latou saisai o latou tino e faaaogā ai filifili i faitoto’a ma auala e ulufale ai tagata i totonu o le maota o loo faatino ai le fonotaga, le Te Pae Convention Centre.
O lenei solo tetee na tuufaatasia ma ta’ita’ia e le Peace Action Ōtautahi, ma ua o latou tuua’ia le malo i lo latou nanā ai o a latou sootaga faamiliteli ma Amerika faapea le vaega’au a Isaraelu ma ni kamupani faavaomalo e fausia ma tuufaatasia ‘au’upega mata’utia ma le malolosi.
Faaalia e nei ‘au solo tetee o loo faaaogā nei fuafuaga e nanā le faia ai o atina’e o ‘au’upega faamiliteli.
O le mana’o a i latou nei, ia taofia loa fuafuaga i loketi ma auala faaneionapo o loo faaaogā faamiliteli, faapea le taofia ai o le faatinoga o galuega i le Rocket Lab e pei ona faatautaia i le Māhia Peninsula.
E fai sina tele o tuua’iga a i latou nei, ae i le taimi na faasolo ai a latou solotetee ma na molimauina i lipoti mai le NZ Herald le aveese faamalosi ai e leoleo o le to’atele ma taofia faapagota.
I le fonotaga o loo faamauina ai le auai atu o le Minisita o Puipuiga, Judith Collins, ma na ia faaleo o le fonotaga o loo taula’i i le puipuiga o vanimonimo o le atunuu ma le tele o masini o drones, ma auala faatekonolosi mo galuega puipuia.
E ui foi i nei faafitauli e le’i taofia ai le faafetaia e le tamaita’i Minisita o le galuega fitā o loo feagai ma tagata Kiwi o loo nafa ma lenei matātā.
Puna o Faamatalaga: https://www.nzherald.co.nz/nz/christchurch/pro-palestine-protesters-blockade-christchurch-aerospace-summit-chain-themselves-to-doorways/YYOLNDKVRJBNLDZS4WI2LCTVYU/
