Na vaaia le toatele o tagata i fafo ane o le ofisa o le Palemia i le asō ma isi vaega o le atunuu i le fia faailoaina o le latou tetee i le alia’e mai pea o faalavelave ua aafia ai le soifua o le aufaipisinisi aemaise tagata faigaluega i pisinisi e pei ona iai si tagata lea na maliu foi i le vaiaso talu ai ina ua osofaia se dairy i Sandringham.
O si alii e suafa ia Janak Patel lea ua maliu ma ua afua ai le valaau o tagata i le malo ina ia faia ia se faatatau i lenei tulaga ma faia nisi gaioiga faaopoopo i le sailia o le ausolitulafono.
O le ‘afa o le 12 i le aoauli o le asō sa fuafuaina ai le tapunia o dairies mo le lua itula ae faatino le tetee lea. O faailo ma pepa faalauiloa o lea tetee o loo tusia ai nisi o upu faapea ua tapunia a latou pisinisi e faailoa ai lo latou faaaloalo i lē ua maliu ma i latou foi ua maliliu muamua i tulaga faapea.
O nisi faailo ua agai sa’o i le tamaitai Palemia e faapea ua alagatatau loa ona fai ni fesoasoani i le taofia o nei ituaiga solitulafono.
O loo valaau nisi ua tatau ona matuai tigaina ni faasalaga e tuuina ia i latou e faamaonia solitulafono i tulaga ia.
O Ueligitone foi ua lipotia mai e faapea foi se gaioiga na faatino ai i le fia faailoa o le lagolago ma faamaisega mo si alii o Patel.
O le ofisa o le minisita o tupe ma o le sui palemia foi Grant Robertson lea o loo faia ai solo tetee a i latou ia i Ueligitone.
