Ua lē lava moega i le vaega o le maota gasegase i Motootua e faapitoa i fanauiti le Pediatrics ward, mo fanau ua taofia ona o auga o le flu pepesi nei i lo tatou atunuu.

Talu ai lea tulaga ua ave ai nisi o fanau ua taofia i falemai faaitumalo e latalata i o latou nuu, ae o fanau ua ogaoga aafiaga ua faailoa e le Faatonu sili o le Soifua Maloloina, ua oo atu nei le aofaiga i le 53.

O fanau ia ua taofia i potu mo gasegase tigaina i le falemai o Tupua Tamasese Meaole i Motootua.

I le silia ai nei la i le 3 masina o malosi le pepesi pea o le flu i Samoa ua faamauina nei le silia i le 2 afe limaselau tagata e toatele i fanau ua taia i le flu.

O le flu o le ituaiga o le Influenza B lea o loo aafia ai le toatele o fanau e i lalo ifo o le 13 tausaga le matutua.

O le feiloaiga na taloina e le pulega o le matagaluega o le soifua maloloina ma tusitala na faailoa ai e le Faatonu Sili le susuga Aiono Dr Alec Ekeroma, le tatau ona faamalosia puipuiga o le tumamā lautele, ma taofi le feoai a o aafia i le flu ina ia taofia ai le pipisi o le faamai.

Ua talia ai nei e le kapeneta le talosaga a le matagaluega mo le vaiaso muamua o le masina fou o Me e toe faaauau ai ona malolo fanau mai le tuuaga o aoga o loo iai nei, i se taumafaiga e faaitiitia le pipisi o le flu.

Le Faatonu sili Aoao o le Soifua Maloloina.