Ua fā nei o tausaga talu ona faatautaia mai e le afioga ia Aiono Tuala Toalepai ma lona faletua ia Julie Aiono le taamilosaga o le Basketball i totonu o Aukilani.

E 65 ‘au sa amata mai ai le taamilosaga mai atunuu eseese o le Pasefika i fanau mai le 9 tausaga agai i luga i tupulaga talavou ua tatala ai le avanoa le matutua e fia auai.

O le faamoemoe maualuga o le afioga ia Aiono ma lona faletua ua faatinoina ai lenei polokalalame o le taumafai lea ia tatala le avanoa mo fanau e taaalo ai i lea foi taaloga o le basketball.

O le taimi nei ua faatuputupulaia le fuainumera o ‘au lea ua auai i totonu lea ua oo atu i le 98 ‘au e aofia ai ‘au a tamaitai ma alii.

Na ta’ua e Aiono o laua ma lona faletua ia Julie o loo faauluuulu iai lenei faamoemoe e 20 ‘au e lei taliaina i le taamilosaga i lenei tausaga ona ua tuai ona faaulu mai ma ua vaavaai atu foi laua ua fai si tele o ‘au ae utiuti le taimi o loo faagasolo ai le taamilosaga.

E faatasi i le tausaga ona faatino le taamilosaga lenei.

O le itu e sili ona lelei ai ma faatāua mo fanau, o le taumafai lea o le tamaititi ia iai lona loto e fia taalo ai mo lona atunuu, auā o le fatu atoa lea o lenei taamilosaga ia taumafai ia totō le lotonuu i fanau e taaalo ai i lenei taaloga i o latou atunuu i taimi o i luma.

E tasi le ‘au a fanau Samoa o loo malaga mai i Melepone ae o le tele o ‘au o alo ma fanau i atunuu eseese o le Pasefika i totonu lava o Niu Sila.  

O le Aso Faraile, Aso Toonai ma le Aso Sa, o le vaiaso ua mavae 21-23 o Setema na faataunuuina ai lenei taamilosaga i le Trust Stadium i West Auckland, ma sa maitauina ai le faatumulia o lea nofoaga i mātua mai atunuu eseese o le Pasefika sa auai atu e lagolago taaloga a le fanau.

O le fatu atoa o ia aso o le lagona fiafia o le fanau i le faatinoina o le taaloga ae ua maua foi se taimi e mafuta ai tupulaga ma fanau o le Pasefika, ma e faapena foi se lagona o le afioga ia Aiono ma lona faletua ia Julie faapea i latou uma sa faatautaia le faamoemoe i lea aso, o le lagona fiafia ona ua mafai ona faataunuuina ma le manuia le taamilosaga o lenei tausaga.

Ma o loo iai le faamoemoe i lenei taamilosaga ia mafai ona fili ai se ‘au mo fanau e mafai ona malaga mo Amerika i se taimi o i luma.