E toatasi le tagata ua faamaonia mai ua maliu ma le toaono o le aumanunua i le faalavelave tau taavale na tulai mai i Papakura i le po anapo.
Fai mai le RNZ na valaau ane le fesoasoani faavavave i le mataupu lea e aofia ai se taavale ma se tamai loli i luga o Porchester Rd i le lata i le 11 i le po anapo.
Fai mai leoleo e toatasi ua maliu ma le toafa o loo tigaina manuaga ma le toalua e manua mitimiti.
Na aveina atu i latou ia i le falemai i Middlemore mo togafitiga ma sa galulue foi leoleo ma le ausuesue i le faamautuina o le mafuaaga o le faalavelave.
E oo mai i le taimi nei o loo faagasolo pea suesuega ae le o mailoa poo ai ua maliu ae o ai foi na mafua ai le faaletonu ua lavevea ai ia taavale.
O le lipoti a le Herald o loo ta’ua ai o isi o loo manunua i lenei faalavelave o nai tamaiti.
