O se alii mai fafo sa galue i le kamupani vaalele o le Polenisia o se pailate i tausaga ua mavae, na faafoeina le vaalele laititi o se motor glider lea na pa’ū i le sami i gataifale o le nuu o Vaitele i le aoauli o le Aso Gafua o lenei vaiaso.

Ua faamaonia mai e leoleo ua maliu lē na faafoeina lea vaalele laititi, ae o loo faia suesuega i le mafuaaga o le faalavelave.

O le molimau a nisi o tagata faigaluega o le kamupani o le Bluebird i Vaitele lea na palasi iai le vaalele laititi i o latou gataifale, sa latou vaaia o felelea’i i gatai i le sami le vaa ae poo le ‘afa o le 2 i le aoauli na lele ane ai ma palasi i le ogasami o loo sua mai ai le oneone ma la’u i uta mo galuega a le kamupani.

O le tala ane a leoleo sa iai i le nofoaga, ua mae’a ona logo le toalua o lē ua maliu.

Ua faasa’o ai e leoleo ma se lipoti na muamua salalau i upega tafailagi na ta’ua ai o se vaalele la’upasese na aafia i le faalavelave.

Faaalia e leoleo e leai se pasese ua na o lē e ana le vaalele laititi ua maliu ai i le faalavelave.