E to’atasi se tagata ua faamaonia mai nei lona maliu, i se faalavelave tau taavale, e aofia ai se pasi la’u pasese e alu i le uila (electric bus) ma se taavale laitiiti.
I lipoti mai le NZ Herald, na mū taavale uma e lua ina ua lavevea, ma e faapea e fai lava sina mata’utia o le mū.
Faamauina na tula’i lea faalavelave i Tamaki Drive i Parnell, ma o le taeao nei na faamaonia mai ai e leoleo le maliu o le tagata na aafia i lenei faalavelave.
Ta’ua e malu o le malo o se matāupu ua molimauina ai le mafatia o le to’atele.
E tusa ai ma lea matāupu, e faapea na lavevea taavale, ma o le tama’i taavale e foliga na mamau i lalo o le pasi la’upasese i le taimi na aafia ai a o le’i sasao ane le afi ma faaleaga uma ai taavale.
Faamatala e molimau na iloa atu lava afi ua sasao e ui i se mamao sa o latou iai poo le 3-4 mita le maualuga na oo iai le sasao o le afi.
Faamanino e le sui o le Tineimū ma faalavelave faafuase’i Assistant Commander Chris Lind e taunuu atu lo latou vaega ua matua’i faatama’ia lava le pasi ma le tama’i taavale.
Na ia faaalia le to’atele o tagata na avatu i le falema’i, ma e ta’ua e to’atasi o loo i se tulaga tigāina.
O loo tapu ona uia e nisi lea faaitu ona o tulaga o le lē saogalemū itu tau i le soifua mālōlōina ona o tulaga o iai le pasi la’upasese; talu ai o maa na ola ai le pasi o se lithium battery, e fai lava sina oona ma le leaga pe a oo ina faaleagaina e aafia pe mama’i ai tagata.
I le aga’i mai i le taeao, na molimauina le faaaogāina ai o isi itu auala mo avetaavale i le feoa’iga i le taeao e pei ona faaaogā ai o le auala Shore Road, Remuera Road ma le State Highway 1.
Ua tuuina mai nei e le sui o le puleganuu o Ōrākei Sarah Powrie faamaisega mo aiga faavauvau ua motusia faafuase’i le māfua’aga ma lē ua fano lona ola ona o lea faalavelave mata’utia.
O loo faasolo su’esu’ega a leoleo ma le vaega le tineimu e tusa ai ma lenei matāupu.
Puna o Faamatalaga: https://www.nzherald.co.nz/nz/auckland/parnell-vehicle-fire-crews-battle-blaze-after-responding-to-serious-crash
