O le afioga a Aupito William Sio, Poto Williams, David Clark, Jamie Strange, Marja Lubeck ma Paul Eagle, o le toaono lea o faipule o le Leipa o le a litaea i le faigapalota o le 2023 e pei ona faailoa i le lipoti a le One News.
Pei ona silafia o Aupito, ma David Clark o loo umia tofi minisita sa faapea foi ma Poto Williams i le matagaluega o leoleo mo le faigamalo i le taimi nei ma o le a tumau ai pea i o latou tofiga seia oo i le palota.
Saunoa le palemia Jacinda Ardern ua mae’a feiloai ma i latou uma ia taitoatasi o faipule faapea ma minisita ma ua faia uma a latou faaiuga e fua i fuafuaga a le tagata lava ia ma e na te faaaloalogia foi lea tulaga.
Sa ia faafetaia ai le minisita o tagata Pasefika mo lana galuega faatino i le faatoesega o le Dawn Raid, faafetaia foi le minisita o mataupu tau pisinisi mo suiga ua faia i supamaketi atoa ai ma lē sa avea ma minisita o leoleo mo le faataunuuina o suiga i mataupu tau fana.
I le itu agai fai mai le taitai o le National Christopher Luxon e le o faalogo atu lava i nisi mai lana pati e faatatau i ni litaea sei vagana le toatolu ua mae’a ona faailoa muamua o Ian McKelvie, David Bennett Jacqui Dean.
