E toaono tagata ua pueina i le mae’a o le maua o le tusa ma le 2.5 miliona o le tau o auupega, taavale ma fualaau faasāina faapea ma tupe na maua e leoleo i Palmerston North.
Ua maua ia tulaga ina ua faia se suesuega a leoleo i nofoaga e valu i Aukilani ma Palmerston North o se vaega o le Operation Cobalt, se taumafaiga fai faaasi a leoleo e agai i gaioiga a kegi.
E toafa alii mai le 32, 36, 45 ma le 55 tausaga le matutua ma tamaitai e toalua e 31 ma le 32 tausaga ua pueina i lenei mataupu ma ua fuafua e tutulai i le faamasinoga i le aso 2 o Tesema.
Fai mai le One News pe a ma le 560 afe le tupe na maua e leoleo ma le tusa ma le 9 kilo o le aisa e oo atu lona tau i le 1.6 miliona.
Ta’ua foi e leoleo o nisi o taavale na o latou aveina e aofia ai ituaiga taugata o le Harley-Davidson, Audi ma Range Rover, BMW ma se Ford Raptor.
E fitu auupega o fana faatasi ai ma isi auupega faasolitulafono na maua iai i lea osofaiga.
