E to’aono leoleo poo Malu o le Malo ua faatāua ma manatua e le matāgaluega o leoleo, falepuipui ma le ola toe fuata’ina i le sauniga o le aso faamanatu o leoleo i lenei tausaga a latou tautua i le atunuu e ala i le matāgaluega.
O le Aso Gafua na faatino ai lea sauniga o le police remembrance day e faia i tausaga ta’itasi e manatua ai le galuega o faatino e alii ma tama’ita’i leoleo ae manatua ai foi ma leoleo ua fai i lagi le folauga e pei o malu o le malo e to’aono na maliliu i le 12 masina ua tuana’i.
O i latou ia e aofia ai le leoleo tā’ailua o Coporal Sa Hitilepi, o le leoleo Constable Lui Steven Sipiliano, o le isi leoleo Constable Rex Memea, o le tā’ailua o Coporal Kid Roache, ma leoleo e to’alua sa umia le tulaga faaleoleo o le Satini poo le police sergeant o Malofou Aiago ma Malo Faamau.
Ua faailoa e le matāgaluega i lana upega tafa’ilagi o le tautua ma le ofoina o soifua o ia malu o le malo i le galuega o le a manatua pea e lē galo.
