O le Matāgaluega a Faleata i le Ekalesia Faapotopotoga Kerisiano Samoa poo le EFKS, ua maualuga le numela o alii sa su’e i le su’ega ulufale i le Kolisi Faafaifeau i Malua o lenei tausaga ua faamanuiaina, ma e to’aono i latou.
Ua pito iai le to’afā o le au su’e mai le Matāgaluega a Niu Sila i Saute ua faamanuiaina, o le Matāgaluega a Apia e to’atolu, o Matāgaluega a Faasaleleaga ma Lotofaga/Lepa/Aleipata e ta’i lua o latou sui ua manuia i le su’ega ulufale ma matāgaluega e 12 e aofia ai Apia i Sasa’e, Falealili/Safata/Siumu, Laumua o Aotearoa, Vaimauga, Malua, Aana, Vitoria, Aukilani, Manukau, Kuiniselani i Saute, Niu Sa Uelese, ma Niu Sa Uelese i Sisifo e ta’itasi o latou sui ua faamanuiaina i le su’ega ulufale i Malua.
O le to’a 29 ua pasi i le su’ega mo le kolisi faafaifeau i Malua o le a faia a latou ta’utinoga i le masina amata o le tausaga fou, a o le’i ulufale atu mo le 4 tausaga o a’oa’oga i totonu o lea kolisi faafaifeau i lo tatou atunuu.
O le Aso Gafua na faailoa lautele mai ai le faai’uga o lea su’ega ulufale ma suafa o i latou ua faamanuiaina.
