Ua maua mai se isi lipoti lata mai i le osofaiga o le pamu penisini a le Caltex i New Lynn lea na lipotia atu i talafou ananafi.

Ua pue e leoleo tagata e toalua i le mataupu lea ae o loo tau sailia pea le isi toatolu auā e toalima i latou ia sa lipotia atu na o latou faataunuuina lea osofaiga.

O le po o le Aso Lua o le vaiaso nei na osofaia ai le pamu penisini lea na sosola ai ma le pusatupe a le kamupani.

O le toalua na pue e leoleo o tamaiti e 14 tausaga o le isi ma le isi e 17 tausaga ma o le asō e tutulai ai i le faamainoga o Talavou i Waitakere.

O moliaaga e aofia ai le gaoi, faamoemoe e faaleaga ni mea ma le ave faasolitulafono o se taavale.

O le toalua foi lea ua ta’ua i le lipoti ua molia foi i le gaoi i le osofaia o se pisinisi i Mt Roskill i se taimi e lei mamao atu.