Ua faailoa nei i ni faai’uga ua mae’a fofogaina e le Faamasinoga Maualuga i le masina na te’a nei o Setema ma le masina lenei o Oketopa, e to’alua tagata ua nofosala i le falepuipui i le solitulafono o le faaaogā o pepa fanau o isi tagata e talosaga ai tusifolau e avanoa ai ona malaga i galuega faavaitaimi, ma faaaogā foi ia pepa fanau e lesitala ai i le palota tele ua mae’a atu nei.
O Liu Feaualii Uaita o Aele o sana solitulafono sa noatia ai ona maua sona tusifolau e malaga ai i galuega faavaitaimi ua nofosala i le 2 tausaga ma le 10 masina, ae o Sione Fareni o Solosolo ma Leusoalii e 15 masina ua nofosala ai.
Sa ia faaaogā le pepa fanau o lona uso laitiiti e talosaga ai lona tusifolau e malaga ai i galuega faavaitaimi ona ua matua ona tausaga e lē agavaa.
O le pepa fanau foi lea ma le tusifolau na ia ave e faamaonia ai le lesitala mo le palota ae na maua ai ma ave loa i leoleo mo su’esu’ega.
O nisi ia o matāupu mai le ofisa o faigāpalota na maua ai ia faiga solitulafono, a o vevesi le atunuu e fai lesitala o le palota tele ia Aokuso.
