E tusa o le ‘afa o le 3:30pm i le afiafi ananafi, Aso Faraile 15 Iulai, na oo ane ai se valaau i Leoleo, e lipotia ane le faalogoina o se fana o faapāpā i le Barry’s Road i le pitonuu o Glendene i Aukilani i Sisifo.
I se faamatalaga mai leoleo, na taunuu atu ma latou maua ai le taatitia mai o ni tino maliliu o ni tagata se to’alua i lea tuatusi.
O se tuatusi i Te Atatū Peninsula na maua i ai e leoleo le alii e iai le talitonuga e iai lona sootaga i lenei faalavelave mata’utia ma avatu ai i le ofisa o leoleo mo su’esu’ega.
Sa faamautinoa mai e leoleo i le mamalu o le atunuu o loo alala i lena faaitu o Aukilani, e ui o se faalavelave ua tulai mai ai lagona faate’ia ma le lē mautinoa o tagata, ae sa faamautinoa e leoleo, e leai se isi tagata o latou toe sailia i le fesoota’iga ma lenei faalavelave, e ese mai le tagata lea ua latou taofia nei.
O lea faalavelave na momoli mai ai se feau a le Auckland Transport i luga o le tweeter e faapea, o le a tapunia lena vaega o le aualatele mo sina taimi i le aoauli ananafi i le va o Glendene Ave ma Glen Marie Pd a o aga atu ai leoleo ia latou su’esu’ega i le faalavelave na tula’i mai.
O loo talosagaina foi e leoleo soo se tasi e iai sona silafia pe na ia molimauina lenei faalavelave ina ia faafesoota’i atu leoleo i le 105 ma ta’ua le 220715/6707.
Lipoti lata mai:
Ua māua mai lipoti lata mai i le taeao nei (Aso Toonai, 16 Iulai 2022), ma faamautinoa ai, o se tamā ma sona afafine, o i laua ia na maliliu i le faalavelave e pei ona tafana ai i le aoauli o le aso ananafi, Aso Faraile, 15 Iulai 2022).
O le taeao la o le asō ua faatulaga e tulai ai luma o le Faamasinoga Faaitumalo a Waitakere le alii 27 tausaga le matua i moliaga e 2 o le fasioti tagata. O le itula e 4:30pm ananafi na maua ai e leoleo lenei alii i se fale i Te Atatū Peninsula, ma ta’ua i lipoti e iloa lelei e leoleo lenei alii.
O loo ta’ua i lipoti i le Herald i le taeao nei, o le tamā ma lona afafine ua maliliu i lenei faalavelave e iai lo la sootaga i le kegi a le Head Hunters.
Ta’ua e Detective Inspector John Sutton, ‘o i laua ua maliliu ma lē ua molia nei, e masani i latou.’
