Ua tua i faanoanoaga le tāgapalolo a ni aiga i Salafai ina ua maua i le taeao o le Aso Faraile na ta ai le palolo le tino maliu o se tamā e 59 tausaga le matua mai le afioga o Vaisala i Savaii.

O loo masalomia o lea tamā na maliu o se ma’i oso i le vaveao a o iai i le sami mo tāgapalolo.

E 12 tausaga o le tamaitiiti mai Papa i Sataua na maliu foi i lea lava aso, ma na faaalia e le Matagaluega o leoleo o le 12 tausaga ua maliu e to’alua iai tamaiti na aga ii le ta ga palolo ma o loo masalomia na ta e le galu ma pa’ūū ai loa i le sami, sao mai le isi to’atasi ae maliu ai le isi, ma o loo masalomia na malemo.

E ui i lapata’iga na tuuina mai e le ofisa o le vaaitau i le vaiaso ua mavae i le siisii o le tai ma le souā o le gataifale, ae le’i taofia ai le atunuu i le aga’i atu e faatali le a’e mai o le i’a o le palolo e na o le faalua i le tausaga ona tāina.

O loo faaauau nei su’esu’ega a leoleo i lea mataupu.