I le mae’a o tuliga ma leoleo ua faamaonia mai e toalima tamaitai talavou ua pueina mai le itu i Sisifo o Sini.
O le faamatalaga e faapea a o agai atu le vaega suesue a leoleo e aofia ai ma taifau ua toleniina i le galuega, e agai atu i luga o le Great Western Highway e lata i Blacktown ae latou vaaia ai le taavale o le ituaiga Toyota Kruger SUV e talitonuina sa gaoia, na taumafai e taofi le taavale peitai e lei tu ane.
Na lipotia o se taimi mulimuli ane na vaaia ai e leoleo le taavale lava lea ua feto’ai ma se loli ma sosola ese ai i latou uma ia e toalima, na tamomoe agai i le togavao peitai na maua lelei e taifau a leoleo.
Na pueina uma i latou ia ma o loo iai nei i le ofisa o leoleo mo suesuega.
Fai mai na togafitia le 16 tausaga lea sa aveina le taavale ina ua osofai e taifau ma o loo faagasolo pea suesuega a leoleo i lea mataupu.
