E to’alima Malu o le Malo poo leoleo ua faai’uina ma le manuia lo latou taumafai i se a’oa’oga na faatino e le faalapotopotoga o le Koluse Mumu, mo le faia o galuega e faaoo atu ai le fesoasoani muamua i tagata e aafia i ni faalavelave.
Ua faailoa i se pepa o faamatalaga e lua tausaga o le a faatautaia ai e leoleo e to’alima ua faauu ma maua tusipasi i le faatinoga o le fesoasoani muamua, le a’oa’oina o lea tomai ina ia faasopolia le vasega o alii ma tamaitai leoleo.
O le faafetai lea a le Komesina o le Matagaluega o Leoleo, Falepuipui ma le Ola Toe Fuata’ina, i le mae’a o lea a’oa’oga, ona ua iai nisi o Malu o le Malo ua mafai ona faatautaia lea vaega tāua e faaopoopo i tiute faatino o leoleo, ina ia lava tāoso i soo se taimi e tutupu ai ni faalavelave, ae ua silafia gaioiga uma mo le ofoina atu o le fesoasoani muamua e laveai ai ola ma soifua o tagata.
