E toafitu tagata na maliliu i luga o auala tetele i totonu o le piriota o le Eseta o lenei tausaga.

O se tala faanoanoa tele e tusa ma lipoti mai leoleo ma o se maualuga ua toe maua ai le fuainumera na faamauina i le Eseta o le 2021.

O le faalavelave matuia na tupu i le po o le Aso Sa lea e oo mai i le taimi e tuufaatasia ai tala o le taeao ua toafā tagata maliliu, toatolu na maliliu i le nofoaga na tupu ai le faalavelave ae o le isi toatasi na mulimuli maliu i le falemai.

O le toalua o i latou nei e faapea o ni fanau aoga Meleisia o loo aooga i le Iunivesite o Canterbury.

E ese mai tagata maliliu ona o faalavelave tau taavale i taimi o le Eseta, e toatele foi tagata manunu’a.

O le taeao nei i le itula e 6 na faamuta ai le piriota aloaia o le Eseta o lenei tausaga ma ua toe augani mai leoleo i avetaavale uma e ave ma le faautauta a o toe foi mai ai le toatele mai tafaoga ma malologa o le Eseta.