O itumalo faapalota o Gagaifomauga Numera 1 ma Gagaifomauga Numera 2, faapea Aiga i le Tai ma Faleata 3, ua sainia i le amataga o le vaiaso nei uluai vaegatupe ta’i 160 afe tala mo le miliona tala lona lua.
O ia vaegatupe e totogi ai tagata faigaluega ma tupe o alauni o sui o komiti o Fono Faavae, faapea ma le faagaioia o ofisa o Fono Faavae.
O loo malaga i atunuu i fafo i fonotaga le Minisita o Tina ma Tamaitai Atina’e o Afioaga ma Aga Fesootai o loo iai le vaaia o le poloketi tasi le miliona tala, ma ua na o le Minisita o Tupe sa molimauina le sainia o uluai vaega tupe mo ia itumalo.
Ua faailoa i ta’ita’ifono o komiti a Fono Faavae a ia itumalo o sui Faipule foi o Gagaifomauga Tasi ma le Lua, o Aiga i le Tai ma Faleata 3, e manaomia lipoti o faamatalaga o a latou atina’e ua faataoto ma fuafua e faaaogā iai le 840 afe o le miliona lona lua, a o lei faamatuuina atu auaua’i lea vaegatupe o loo totoe o le latou tai miliona tala.
Faaalia e le Minisita o Tupe e iai itumalo o loo lelei le polokalameina ma le faaaogāina o tupe, a o nisi itumalo o loo iai ni faaletonu.
O le itumalo o Faasaleleaga Numera 2 sa faia iai se suesuega i se tasi o vaegatupe o loo fesiligia lona faaaogāina, ma ua faaalia e le Minisita o Tupe ua oo atu le lipoti o lea suesuega i le komiti faatonu o le poloketi, ma ua na o le komiti faatonu le steering committee o le poloketi e talanoaina ma faia iai se faaiuga i lea mataupu.
