Ua lipotia i le asō i le 9News e toafā ni fomai o loo suesueina i lo latou sao i le maliu o se alii talavou i se tasi o falemai i Sini.

O le suesuega sa faia ua iloa ai na maliu Adam Fitzpatrick ona o ni mea sese sa faia na afua ai se faaletonu i le tube sa faamānava ai ma iu ina aafia ai sia alii e 20 tausaga le matua. 

O le faamatalaga a lona tina o loo ta’ua i le lipoti e faapea e talitonugata le tulaga na tulai mai i si ana tama.

Fai mai le coroner sa feagai ma le suesuega o Derek Lee e na te fautuaina le tuuina atu o fomai ia e toafā ia faia iai se suesuega a le NSW Medical Council i ni a latou amioga ua lē ogatasi ma tulaga faapolofesa e tatau ona faatino ai le galuega. 

O le 2020 na tulai mai ai le mataupu lea ina ua aafia le alii talavou o Adam i manu’aga i lona ulu ina ua lavea lana taavale ma ave atu ai i le falemai o St George mo togafitiga peitai mulimuli ane ma’umau ai lona ola.

O loo ta’ua i le lipoti o le iuga mai le suesuega a le coroner, e lei valaau fomai ia mo se fesoasoani mai le specialist ae ua faatino lava e latou le togafitiga ma sese ai le togafiti sa faia ma aafia ai māmā o le alii talavou ma maliu ai lava mulimuli ane.