Ua lata ina mae’a ona tapena le mataupu o se talosaga a le sui faipule o le itumalo o Faleata 4 le tofa Ale Vena Ale, o le a lu’i ai le teuteuga o le Tulafono o Faigapalota na pasia e le Palemene a o lumanai le palota tele ia Aperila o le tausaga na te’a nei, ua lē mafai ai ona faamavae se faipule ma lana pati faaupufai ona see lea e avea ma faipule tuto’atasi.
E to’afā faipule o le vaega e puipuia aiātatau a tagata ua latou lagolagoina lea lu’i faaletulafono faatasi ai ma le faipule o Faleata Numera 4. Na faailoa lea laasaga ua oo iai tapenaga a le tofa Ale Vena i se faatalanoaga ma se auaunaga faasalalau a tagata Samoa i luga o Upega Tafailagi, i le aai o San Diego i Amerika. Ae o se faatalanoaga ma le sui faipule i le masina na te’a nei, na ia faailoa ai o ia ua fia alu ese ma le latou pati faaupufai ona o le mataupu i le lē faia o se suiga i le ta’ita’i.
O lona atugaluga ua lē mafai ona tuto’atasi pe a faamavae ona o teuteuga fou o le tulafono, lea e tatau ona toe foi e fai lana palota laititi.
