Ua faamaonia mai e toafa tagata na ma’umau soifua i lologa na aafia ai Aukilani i le faaiuga o le vaiaso ma o loo iai pea le poloaiga o loo iai lea vaega o Niu Sila i tulaga o faalavelave tutupu faafuasei, state of emergency.
Sa lapataia foi Northland ma Aukilani i tulaga faaletonu o le tau seia oo mai i le taeao analeila ma o loo iai pea lapataiga o timuga mamafa.
Ua fautuaina tagata uma ia nonofo i fale mo le saogalemu sei vagana lava o ni fuafuaga e tatau lava ona faataunuu.
O le feiloaiga a sui o le Kiwirail ma le Auckland Transport ma le aufaasalalau i le asō ua ta’ua ai e 45 magaala o loo tapunia pea ma manaomia ona faia iai galuega toe faaleleia.
O loo iai gaioiga o loo fai mo le faia o nisi alalaupapa lē tumau mo feoaiga a le atunuu i le taimi nei ma ua mae’a ona toe aveesea uma ma faaleleia nisi o pasi e 14 sa poloka i luga o auala i le Aso Faraile talu ai ona o lologa.
O le asō ua faaauau ai le faamamaina o vaega na aafia i lologa a o fautuaina ai pea Aukilani ia silafia o loo tulaga faaletonu pea le tau ma e ao ona faaeteete.
Ua ta’ua i se lipoti i le asō o le petition ua valaau ai mo le aveesea o le pulenuu o Aukilani o loo iai nei Wayne Brown ua oo atu i le 8,900 tagata ua sainia.
Fai mai le Palemia fou o le atunuu o lologa e mafua mai i suiga o le tau ma o le tulaga lea e ao ona silasila iai i le agai atu i le lumanai.
