O le mae’a ai o iloiloga a le komiti o le palola i le vaiaso na tea nei, i talosaga a pagota e to’a sefuluvalu ua taunuu ai i le latou faaiuga e talia talosaga e 14 ma ua magalo ai i tua mai le falepuipui lea vaega o le au nofosala.
Ua faaalia e se molimau e 47 talosaga na tuuina atu ae na o le sefuluvalu na talia mo iloiloga.
O le au nofosala ua magalo i le palola sa tuli faasalaga i solitulafono e pei o le taumafai e faaoo le maliu i se isi tagata poo le attempted murder, fasioti tagata faamoemoeina le murder, ma solitulafono o le limatagoese a o avea ma tagata faigaluega, ma le fasioti tagata pa’ivalea.
Faaalia e le Komesina o leoleo o se tasi o sui o le komiti o le palola, e toatasi se tamaitai sa nofosala ua talia lana talosaga ma ua aofia i le to’a sefulufā o pagota ua magalo.
E faafā ona fono le komiti o le palola i le tausaga mo lana tauaofiaga muamua o lenei tausaga lea na faia ai le faaiuga ia i latou ua faamanuiaina talosaga.
O le isi fono a le komiti e faia i le masina o Iuni, sosoo ai ma le masina o Setema ae taualuga i le fono mulimuli o le tausaga i le masina o Tesema.
O sui o le komiti o le palola e aofia ai le Komesina o leoleo, o le Faamasino Sili, o se sui o ekalesia ma se sui o le atunuu lautele.
