E to’a 62 tagata na mua’i faatino a latou palota i le asō i le faigapalota laititi a le itumalo faapalota a Gagaifomauga Numera 2.
I le tapuni ai o fale palota sa faatino ai palota a i latou e lē maua avanoa e auai ai i le palota tele i le Aso Faraile nei, ua faailoa mai ai luga o le itulau i le upega tafailagi a le Ofisa o le Komesina o Faigapalota le iuga e pei ona ta’ua i luga.
E lua falepalota na faatino ai le uluai palota poo le pre-polling, o le falepalota i Lefagaoalii AOG lea iai le to’a 37, ma le falepalota i Faletagaloa EFKS na iai le to’a 25 o i latou na faatino a latou palota.
E tusa e to’a 127 i latou sa faatulaga e agavaa mo le pre-polling lenei na faatino i le asō, peitai pe a fua i le aofai o palota mai falepalota e lua, e na o le to’a 62 i latou na muai faatino le latou faiga filifiliga, tusa lena o le 49 % pasene pe a faatulaga i pasene le aofai o i latou na palota, faatusa i le aofaiga o tagata e agavaa e tatau ona palota i le asō.
E pei ona silafia, o le faigapalota laititi a le itumalo lenei, o loo sailia ai se sui faipule mo le nofoa i le Palemene a le Itumalo o Gagaifomauga Nu. 2, ina ua tuua faafuase’i le malo e le alii faipule, o ia foi o le minisita lagolago o le Matagaluega o Faatoa’ga ma Faigafaiva, le Afioga Va’ele Iona Sekuini.
