I le ripoti lata mai a le Matagaluega o le Soifua Maloloina na tuufaatasia mai le Aso 16 o Aperila e oo atu i le Aso 18 o le masina lava lenei ua faamaonia ai e to’atasi ua maliu ona o le Koviti-19 i totonu o lenei 48 itula.
Ua si’itia ai nei le aofai o i latou ua maumau soifua i le faama’i i le to’a 13. O le ua māliu o se tamã 73 tausaga le matua ma ona o le fa’aaloalogia ma le amanaia o tau ‘āiga o e ua māliliu, o le a leai ai se isi fa’amatalaga fa’aopoopo e le Mālō.
Ua fa’amaonia mai foi e le Matāgaluega o le Soifua Mālōlōina e 362 i latou fou ua pesia i le siama o le Koviti –19, to’a 15 i latou o lo’o fa’anofoesea i le Falema’i ma le to’afā o lo’o i le potu tigāina (ICU) mai le 2:00 i le aoauli o le Aso 16 Aperila 2022 i le 2:00 i le aoauli o le Aso 18 Aperila 2022.
E fautuaina le mamalu lautele o le atunu’u ina ia tausisia puipuiga uma mai le Matagaluega o le Soifua Maloloina ina ia faia tali fofoga, tausisia le va ma le isi tagata (social distancing) ma ia tautuanā le nonofo lelei i aiga ma ia fa’anofoesea i se vaega fa’apitoa o lou fale pe a masalomia ua e a’afia i āuga o le siama.
