O loo tigaina nei i manuaga se tamaititi talavou na aafia i se vevesi na tulai mai i le faaiuga o le vaiaso i le faaitu o Castle Hill i le itu i Matu o Sini.
Ua faia nei suesuega a leoleo ma talosagaina nisi e silafia ni faamatalaga i le faalavelave lenei e faapea na valaau ane ai le fesoasoani faavavave i se nofoaga o le Fred Caterson Reserve i Castle Hill poo le lata i le 3 i le aoauli o le Aso Sa na tea nei ma maua atu iai se tamaititi 15 tausaga lea ua tui e le tagata sei tulou.
Fai mai le Alaata 7 a Ausetalia e talitonuina o le tamaititi na agai ane e fetaui ma ana uo e toalua i le nofoaga lea a o lei savali ane i le vaega na tupu ai le faalavelave lea na fetaui ai ma se isi foi kulupu i i le kapaka.
Ta’ua i le lipoti na iai se feupua’iga a i latou ia ma iu ai ina faifaitetele ma pailima ma ua faailoa i le lipoti o se naifi ma se samala sa faaaogaina.
O le taimi o le vevesi na faaoolima ai loa le tagata i le talavou lea ma sosola ese mai ai.
Na togafitia e paramedics le tamaititi ma aveina atu ai i le falemai i Westmead ma faia ai le taotoga ma ua lipotia e tigaina.
Na saunoa ai le minisita o leoleo o Paul Toole e le faatagaina lava e leoleo ituaiga amioga faapea i le komiuniti ma o loo faia nei le sailiga.
