E toalua talavou ua tuuaia i se vevesi na tulai mai i le alatele i le faaitu o Beach Haven i Aukilani ua maliu ai se alii ma o loo teena e ia talavou o la moliaga.
O Joshua Tasi e 28 tausaga na maliu i le mae’a o se feteenaiga ma ni tagata sa iai i totonu o seisi taavale na lavea i le aso 3 o Mati.
Fai mai le one news e toalua talavou e 14 ma le 17 tausaga ua molia ai i le fasioti tagata i le mataupu lea.
O le toalua la lea na tutulai i le Faamasinoga Maualuga i Aukilani i le aso i luma o le faamasino o Justice Timothy Brewer ma sa faatonuina ai le faasā ona faailoa o la igoa.
E fā vaiaso ua faatulaga ai le la faamasinoga ia Me 2024 ma o loo iai nei i se nofoaga mo talavou.
Fai mai faamatalaga a leoleo e pei ona lipotia e talitonu sa faatele ona tatui lē ua maliu sei tulou ma ua molimau foi se tasi o tuaoi o lē ua maliu toeitiiti 9 tausaga o aumau i Beach Haven ae faatoa tulai mai lea o se faalavelave faapea i lo latou faaitu aemaise e mafua mai i se mea faatauvaa.
O le vaiaso talu ai sa potopoto ai le aiga ma sui o le komiuniti i le Shepherds Park e faamanatu le soifua o si alii ua maliu.
