Ua faailoa e nisi o tagata e aumau i Aukilani o loo fosi i latou e tuuina ane o latou fale ia avanoa ai le fausia o se auala e ui atu mai Botany agai i le malaevaalele i Aukilani. 

Fai mai le Auckland Transport ma le Waka Kotahi NZ Transport e mafai lava ona tumau pea ia tagata i o latou fale seia oo ina amata le galuega lea ua fuafua e faatino i totonu o le isi 10-15 tausaga.

Faamatala e se tasi e aumau i Botany na lagona lona le fiafia ina ua maua atu se tusi mai le Te Tupu Ngatahi e faailoa atu ai ia te ia le faaiuga ua faia e aofia ai lona fale i lalo o le Public Works act.

Ta’ua e nisi e aafia foi i lea mataupu o le popolega ona e le o amanaiaia o latou manatu faaalia e tusa o lenei mataupu ma ua manatu ai nisi o le a tuuina se faaseā aloaia i le NZ Human Rights Commission, le pulega a le malaevaalele, le minisita o tupe ma le pulenuu o Aukilani e tusa o le mataupu.

O le poloketi e aofia ai lea auala fou ua faaigoaina o le Botany Rapid Transit project.