Ua faia e le vaega o le matagaluega o leoleo, falepuipui ma le ola toe fuataina e suesueina ni tuuaiga e aafia ai amio taualoa a leoleo, ni moliaga faasaga i se leoleo asiasi poo se police inspector ma se leoleo taai lua o se tamaitai, e mafua i lo la faia i se tulaga faalilolilo o se suesuega i le faalavelave tau taavale i Vaitele fou na aafia ai le soifua o se tama talavou o ia lea o Tuau.
E fā moliaga o le leoleo asiasi ae lua moliaga o le leoleo taai lua.
O ia moliaga e pei ona faailoa mai e se molimau faatuatuaina e fesootai i le faia e ia leoleo o se suesuega e aunoa ma le faatagana a le Komesina o leoleo, ma o se suesuega foi na faia i le faamoemoe e penefiti pe manuia ai se isi tagata.
O ia moliaga ua faia i aiaiga o le tulafono o galuega faaleoleo i le mau e faapea ua solia e i laua ua tuuaia.
I se avanoa na fesiligia ai le leoleo asiasi o loo tuuaia le susuga Li’o Faataumalama na ia faamaonia ai le tuuina atu o o la moliaga ma ua ave foi iai a la tali tetee.
O le faia e ia leoleo o le suesuega na afua mai i se faatonuga mai le Minisita o Faatoaga ma Faigafaiva e pei ona faailoa mai e Li’o, lea foi o loo laumanuia ai ma le suafa o le minisita lagolago o le matagaluega o leoleo ma falepuipu i le faia o lea suesuega.
E lei faatulagaina se aso e valaau ai moliaga o ia Malu o le Malo i le faamasinoga faaleoleo le Police Tribunal, ae ua faailoa mai e le leoleo asiasi o loo molia, ua iai lana loia e tulai mo ia pe a oo ina valaau molimau e lagolago ai moliaga.
