O loo teena e le Palemia Jacinda Ardern faamatalaga e faapea o lana faigamalo e vaivai tele i tulaga tau soligatulafono. Fai mai faitioga ua le mafai e le malo ona puipuia tagata o loo sili ona lamatia soifua mai soligatulafono e pei o le gaoi faaauupegaina.
Faailoa e le Palemia i se faatalanoaga i luga o le Breakfast, e iai lona malamalamaga i le manaoga o tagata e faailoa le faaaloalo ma le faanoanoa i le faalavelave sa tulai mai na maliu ai si alii faigaluega i le Dairy, ae o ia e tetee i le faamatalaga lea e pei e faalala ane e nisi e faatatau i le malo.
Fai mai le Palemia e pau le itu e fia faalauiloa i le atunuu o loo faatalanoa i le taimi nei mataupu ia. Ta’ua e Ardern e ui e foliga ua siitia le aofai o soligatulafono ma ua foliga ua le mafai ona taofiofi, ae na o le pau solitulafono o loo siitia o ram raids poo osofaiga ia ua faaaoga ai taavale e faaleaga ai fale ma pisinisi ona gaoia lea.
Na ia faailoa o le a faaauau pea foi ona lagolago e le malo faleoloa o loo aafia i nei osofaiga e ala i tulaga e pei o meapueata a le CCTV, faapea foi le iai o ni tioata e puipui mai ai faatauoloa mai tagata lautele. Ua faia ia faamatalaga a le Palemia ina ua foi ane mai toe sauniga o si alii o Janak Patel.
