Toe o le vaiaso fou ona toe usuia lea o taualumaga a le Fono Aoao Faitulafono e pei ona faatulaga mo le Aso Lua le aso 20 o Tesema, ae ua lipotia le mae’a tuuina atu e le Fofoga Fetalai o lana tusi ua logo aloaia ai le faipule o Faleata 4 ma Siumu, i o la moliaga e tusa o aiaiga o le Faavae ma le Tulafono o Faiga Palota, e mafua ia la faamavaega tusitusia ua mae’a tuuina atu i le taitai o le pati faaupufai sa avea ai ma sui lagolago o le faafaletui o le vaega e puipuia aiātatau a tagata.
O le molia o ia sui faipule o le a tuuina atu i le Faamasinoga Sili mo se iloiloga ma faia se faaiuga, ina ua tuuina atu ai tali tetee a le tofa Ale Vena Ale ma Tuu’u Anasii Leota i moliaga a le Fofoga o le fono.
O le a faamautu taualumaga o lenei mataupu pe a tauaofia le Palemene mo lana fono faaiu o lenei tausaga, ae o loo ta mau le finagalo o le faipule o le itumalo palota o Faleata 4, e lei faamavae mai o la nofoa ona e lei tuuina atu a la tusi faamavae i le Fofoga Fetalai, ae o le taitai o le pati faaupufai sa avea ai i laua ma sui lagolago.
O le finagalo o le tofa Ale Vena ua faamavae mai le vaega a le HRPP ma e le o fia avea ma sui o se pati faaupufai, ae ua see atu e avea ma faipule tutoatasi ma o le la aiātatau lea.
O i laua foi e lei filifilia ma palotaina e se pati faaupufai ae o le finagalo lagolago o tagata palota o o la itumalo.
O le autu lea o le finagalo o le taitai o le vaega e puipuia aia tatau a tagata ina ua faamavae ia sui faipule o lana pati, o teuteuga na faia i le faavae ma le tulafono o faigapalota o loo manino a faamavae loa se faipule mai lana vaega faaupufai e tatau ona toe foi i tagata palota o lona itumalo e toe fai ai le filifiliga.
