O taumafaiga a le kamupani o le Wilex Samoa e faalauiloa atu i le lalolagi le mafai ona gaosi i Samoa o oloa tau taumafa o le sukalati mai le koko Samoa, ua tele tausaga o le sao o lea kamupani.
Ae o le faaaliga o oloa gaosi o le sukalati ma le kofe a Niu Sila sa faia i Aukilani i le faai’uga o le vaiaso ua mavae sa faalauiloa ai foi ma sukalati o le Koko Loa a le Wilex Samoa.
I se pepa o faamatalaga ua faailoa ai e le pule o maketi a le kamupani ia Reina Fepuleai e to’atele i latou sa tofoina le latou sukalati ua matuā fiafia i le ese ai foi o le taumafa atu i lea oloa tau taumafa e gaosia i Samoa.
Ua iai le talitonuga o le tasi lea o oloa mai lo tatou atunuu ua fai ma avefu’a a Samoa i atunuu o loo faatau atu iai.
O le tasi o manulauti tāua a le faigāmalo fou o le faatau o oloa gaosi a Samoa o se isi lea taumafaiga e siitia ai oloa gaosi i lo tatou atunuu ma una’ia o tatou tagata latou te faatauina.
