Tele tupe e alu i le faasoaina o taavale ma tagata feoai i taimi e fai ai auala, ma ua fai mai ai le pulenuu o Aukilani ua tatau ona vaavaai i nisi faiga fou e tuuitiitia ai tupe alu faapea ai ma le tele o auala tapuni ma aafia ai femalagaiga.
O le finagalo lea o Wayne Brown ma ua fai mai ai i le Auckland Transport e faamalamalama atu le $145 miliona o loo faaalu ai atoa ai ma le faataitai o se isi faiga e paketi lelei ai tupe.
O le tele naua o cones o loo faaaoga e tapunia ai auala, o le umi e tapunia ai se lane atoa ai ma le umi tele e faaleleia ai auala o itu uma nei e lei sao i le mafaufau o le pulenuu, ma ua tuuina mai ai fuafuaga e faaleleia ai.
O itu o loo taulai iai o le faia o se lipoti tutoatasi e faatusatusa ai le tau ma le penefiti o galuega o loo faia, faapea ai le faaleleia atili o polokalame o feutanaiga ma konekarate o loo gafa ma galuega.
O loo talileleia e le Auckland Transport le manao o le pulenuu, ae sili ai ona fiafia le toatele e le o fiafia i le tele o cones e poloka ai auala e ui i molimau a nisi o avetaavale, e poloka ae e le o faia.
Ae mai tagata galulue i luga o auala e pei ona molimau ai i le leitio a Niu Sila, o cones nei o loo mulimulitaia lava le taiala mo le puipuiga o le saogalemu o tagata lautele.
