E 40% ua alu ai i luga sukalati faatau atu i fafo a Niu Sila ma o loo filo ai ma koko mai Samoa i nei oloa gaosi.
O se tala fiafia mo pisinisi gaosi sukalati a o faamanatu ai le aso faapitoa mo sukalati i le lalolagi ananafi.
O ni faamaumauga ua faamauina talu mai le 2019, ma o le tele o molimau a pisinisi o loo fefaataua’ia faavaomalo lenei oloa o loo tele lava ina maketi atu ai oloa o loo maua i Niu Sila nei aemaise o le tofo.
E le’i faigofie le taumafaiga o pisinisi sukalati i totonu o le piriota ua ta’ua ona o faigata o le Koviti.
Ae i koko auina mai Samoa, na molimau ai le Floris Niu o loo sau ai koko mai Samoa, na amata mai i le na o le 3 tone e sapalai i le tausaga ma o lea ua vaavaai i le va o le 25 i le 30 tone i le tausaga.
O le aso 23 o le masina lenei o le a faailoa ai le Pacific Cacao & Chocolate 2022 ma o se ulua’i faaaliga i Niu Sila e faalauiloa ai le gaosia o le sukalati aemaise o koko mai le Pasefika e aofia ai ma Samoa.
