E tele miliona ua faailoa mai e le malo o le a faamatuu mai e fesoasoani i le tuuitiitia o solitulafono.

Ua faafetaia e le Palemia Jacinda Ardern leoleo i suesuega e fesootai ma le fasiotia o le faatauoloa e pei ona ave ai nei le toatolu.

A o taatia ai lenei mataupu i luma o le tulafono, ae na saunoa le Tamaitai Palemia o le a faaauau lava ona taumafai ia tapunipuni faitotoa e ono sao mai ai faiga lē alofa nei o loo aafia ai pisinisi ma tagata faigaluega.

O le mae’a ai o le feiloaiga a le kapeneta ananafi ma talanoa lenei mataupu ua faailoa mai ai le package tuufaatasi o loo sau ai le $4 miliona e lagolago ai local council crime prevention ma o le $2 miliona e mo Aukilani, $1 miliona mo Hamilton ma le $1 miliona mo Bay of Plenty ma e ono faaaoga lea mo moli auala faapea le faia o cameras CCTV.

O le isi faaopoopoga o le faalautele o le agavaa mo le fesoasoani tupe ua ta’ua o le Retail Crime Prevention lea e $6 miliona ina ia aofia ai gaoi ma na tutupu i totonu o le tausaga ua alu. O lea sa na o pisinisi e aafia i osofaiga e faaaoga ai taavale poo ram raids peitai ua suia nei ma faaopoopo iai ma isi gaoi.

O le suiga faaopoopo e tolu iai e pei ona fofoga mai e le malo o le iai o le isi fesoasoani fou o le a sau ai le $4000 mo pisinisi laiti ma faleoloa e mananao i le fog cannon subsidy scheme ma o fagu asu nei poo fog cannons ua faamautinoa mai e le minisita o leoleo Chris Hipkins ua uma ona oka le 455, ma o loo faamoemoe e taunuu a o lei ta le Kerisimasi.