O le savalia ai nei o le lua vaiaso o tapunia pea galuega e ese mai galuega mo auaunaga moomia, o fesootaiga televavave faaonaponei e faaaoga ai masini komepiuta ma telefoni feaveai faapea isi masini e maua ai fesootaiga initaneti ua tapa nei iai le tele o Matagaluega ma Faalapotopotoga a le malo faapea pisinisi tumaoti e faia ai fesootaiga ina ia faaauau ai pea a latou tautua masani. 

O le faalapotopotoga tumaoti a le malo le Faaputugatupe mo le lumanai manuia o tagata le NPF ua tatala a latou auaunaga masani e pei o le faia lea o nonōgatupe o le au fai saofaga i luga o fesootaiga o upega tafailagi ae lē mafai ona maua e le au fai saofaga lea avanoa pe afai e le’o resitala i luga o ia fesootaiga a le NPF. 

E oo foi i isi auaunaga  a le Faalapotopotoga  le totogiina o saofaga ma le totogiina o nonōgatupe ua fautuaina foi le faaogaina o ia fesootaiga. Ua lē fesiligia ai le lelei o tupe maua o kamupani ma pisinisi tau fesootaiga o loo faatau mai ai le initaneti ona e oo lava i isi galuega ma tautua a le malo ua manaomia tele ai nei fesootaiga i le taimi nei.