E toa 9 sui o kegi ua feagai nei ma moliaga e 57 ina ua maua e leolo se uta tele o fualaau faasāina, fana ma tupe i Northland.
Fai mai le One News mai lava i le vaiaso talu ai sa faia ai suesuega i nofoaga i le faaitu lea o Niu Sila e agai sao lava i se vaega ua feta’ua’ina e fesootai faatasi i le tufatufaina o le fualaau faasāina o le aisa.
O suesuega sa faia i Kaitaia, Taipa, Kaikohe ma Kaeo ua maua mai ai fualaau faasāina ia faapea fana ma tupe, fai mai e 16 fana aofia ai ma fana e faasā ona faaaogaina, 45 kalama o le aisa, 250 laau faasāina o le mariuana ma le $36 afe o tupe.
Fai mai na maua ai foi e leoleo ma le tusa ma le $50 afe o le tau o aitema gaoia e pei o taavale.
O le toa 9 la o loo lipotia le molia e leoleo fai mai e iai sootaga i le kegi a le Mongrel Mob, Headhunters ma le Tribesmen ma o loo faaauau pea nei lea suesuega.
