E tele faitioga i omoomo o auala na faaoo ane i le Waka Kotahi, ma ua sau ai ma le valaau ua moomia se suiga.
E 555 talosaga na faaoo atu i le pulega o feoaiga i totonu o le 10 masina muamua o le 2022, ma o nei talosaga o loo sau ai ma le tala e moomia le toe totogi atu e le pulega o tupe faaalu a i latou e ana taavale.
O se siitaga tele le toatele o tagata le fiafia ma ua fai mai ai le kulupu a le Ia Ara Aotearoa Transporting New Zealand i le malo ua moomia nisi auala fou atoa ai ma le tatau ona faaleleia o auala o iai nei.
Tuuaia ai e le pule sili o le kulupu, Nick Leggett le malo i le ave o le tele o lana taulai i le tautuua’i i isi faigamalo ua te’a, o le tau faapea ai ma tagata feoai ae le inivesi e faaleleia auala.
Ae i se vaaiga i tupe toe faaalu a le Waka Kotahi e totogi ai taavale na faaleagaina talu mai le 2019, e oo mai i le aso 6 o Oketopa e $20,136.86 ma e le o aofia ai peimeni na faia i konekarate a le Waka Kotahi.
I faamaumauga a le malo e tauala mai lana sooupu, e silia ma le 45,000 omoomo na faaleleia i luga o State Highways i totonu o le tausaga faaletupe 2022 ma e latalata i le $7 piliona lea o loo inivesi e le malo e faaleleia ai auala i tua faapea State Highways.
