Ua tele ato leiloloa i le malaevaalele i Aukilani, ma o se faanoanoaga tele lea i le toatele o pasese ua aafia.
I molimau a nisi o pasese ua aafia, o le lagona o le lē fiafia ona o le lē lelei o le auaunaga i le malaevaalele lea e le gata o le fiu e vili e le talia, ae o le tele o aso e tau faatali ai ato.
E iai nisi ua faasalalau i luga o le social media na taunuu i Niu Sila i le aso 7 o Tesema ae o lea lava o loo tuli ma ato ma ua faaalia ai le lē fiafia i le Singapore Airlines.
O se tasi o pasese mai Ausetalia ua atoa le vaiaso ae alu atu i le malaevaalele ae sau le tala e na o le toatasi le tagata faigaluega a le Swissport o loo faigaluega i le itu e sue ai ato leiloloa.
Ae i se tali mai a le sui o le malaevaalele Libby Middlebrook i tala a le TV1, o loo galulue nei ma kamupani vaalele ma a latou tagata o loo galulue i tua i ato poo le ā se fofo o le faafitauli ma o le matafaioi lava lea a kamupani vaalele o le faamautinoa e taunuu saogalemu ma maua ato a pasese.
