O le faai’uga ua aumai nei i le lu’i faaletulafono a le ta’ita’i o le Itu agai ma se tasi o faipule sinia o le vaega e puipuia aiātatau a tagata, sa finauina ai e loia mo le itu talosaga, e soli faavae le faai’uga a le Palemene ua faasala ai le faipule o Lepa ma Faleata 3, i le faasalaga o le solitulafono o le faalēmigao i le Palemene, ae o le su’esu’ega a le komiti o tulaga mamalu ma aloa’ia sa aga’i i le solia o tulaga mamalu poo Parliamentary priviledges.

O le mae’a o iloiloga a le faamasinoga na taunuu ai i se finagalo e teena lea mau a le itu talosaga, ona o loo talafeagai le faasala i le faalemigao i le Palemene auā o vaega uma ia e aofia i sailiiliga a le komiti o tulaga mamalu ma aloa’ia.

I le finauga a le Fofoga Fetalai e ala i loia i le mau e lē mafai e le faamasinoga ona aiāina faai’uga a le Palemene ua lē talia ma teena.

Ua faaalia i le faai’uga o loo aiaia i le Tulafono Faavae a le atunuu, e iai le tiute o le faamasinoga na te iloilo ma su’esu’e ai se mataupu ma faia ni faai’uga, pe afai ua solia se aiaiga faaletulafono e faasino i aiā poo ni mataupu ua lē mulimulita’ia ai ala o le tulafono.