Ua iai foi le isi tagata ua ia faailoa i le vaiaso nei o ia foi leisi sa feta’ua’ina le agai atu ma lana foai i le Starship Foundation ae lei taliaina.
Ta’ua e lea tagata mai Te Aroha o Jamie Lock i lana faamatalaga i le One News sa ia faatau lana solofanua o Sierra Sue i le 2019 ma ia foaia ai le 10 afe i le falemai lea o tamaiti le Starship peitai na teena e le falemai fai mai latou te le taliaina foai mai taaloga faitupe.
Ua ia faamatala lana tala lea i le televise ina ua faalogo i le vaiaso nei i le isi foi foai sa tuuina e Mark Chittick ae na teena foi. Na manumalo i se vaegatupe tele le solofanua a Mark ma ia foaia ai se vaega o lea malo i le falemai ona o loo iai i aiaiga o le malo e foai le 10 pasene o le malo i se charity e na te filifilia.
E 570 afe le vaegatupe na ofo ane peitai e lei taliaina foi e ui fai mai lē e ana le foai o si ona toalua na maliu i le 10 tausaga talu ai i le leukemia ma ia vaaia ai le galulue malosi o tagata faigaluega i le falemai ua afua ai lona fia fesoasoani iai e ala i lea foai.
O loo iai aiaiga faataatia e le falemai mo tulaga faapea ma ona o loo le faamalieina nisi o ia aiaiga, lea ua le taliaina ai ia vaegatupe tetele
