O loo teena e Sam Suʻa poo Fauena Leutulī Toese, Sivai Kepi, Fepuleaʻi Faimata Suʻa, Liʻo Faataumalama, ma Lise Schmidt moliaga uma faasaga ia i latou.

Ua tuuina mai foi le faatulagaga a le Tamaitai Faamasino ia Talasa Atoa-Saaga mo le aso 26 o Me o le tausaga fou e iloilo ai la latou mataupu.

Ua mae’a faamautu foi moliaga a leoleo, o le susuga Sam e 147 moliaga faasaga ia te ia, o Sivai e 58 ona moliaga, o le alii Faipule ia Fepuleaʻi e 17 moliaga, o Liʻo Faataumalama e 4 moliaga ma le tamaitai o Lise Schmidt e 9 ona moliaga.

E lei faaigoaina mai moliaga taitasi ae o loo faanumera i le faasologa a le Faamasinoga.

Ua tuuina mai foi le aso 9 o Setema 2024 e faaulu atu ai ni talosaga a i latou nei i nisi matupu a o lei tagofia le mataupu autū i le aso 26 o Me o le tausaga fou.

O ia mataupu o le a tolaulau ai i se tolaulauga a le Faamasinoga i le aso 16 o Setema o le tausaga nei.

O le faai’uga a le Faamasinoga Apili i le vaiaso ua mavae na talia ai le talosaga a i latou ua molia mo a latou mataupu ina ia tolopo atu i le tausaga fou ona e lē o avanoa a latou loia i le aso na atofa mai le faai’uga a le Tamaitai Faamasino ia Talasa Saaga.

O lea faai’uga na poloaiina ai le toe faatulagaga e pei ona iai i le asō.

O le vaiaso fou foi lea o le a tagofia ai e le Faamasinoga mataupu e faatatau i le tatala ai i tua o Sam.

O moliaga o i latou ua ta’ua na afua mai ona o le tagi a le alii faipule ia Lealailepule Rimoni Aiafi i faasalalauga o loo masalomia na faia e le susuga Sam Suʻa ua ta’uleagaina ai lona igoa, o isi o loo molia ma masalomia taumafaiga e nanā le mea moni ma faalafi le alii o Sam na faia faasalalauga.

O ia faasalalauga o loo tuua’ia ai le alii Faipule i le maliu o le tama aoga i le NUS ia Tuau Fasavalu ia Aperila o le 2021.