Ua teena e le Kamupani a le Queensland Rail faamatalaga e faapea ua taloka i fafo tagata faigaluega mai nofoaga e faigaluega ai a o faifaitetele ane ai le matāupu i trains i Brisbane i le asō.
Sa lapata’i ane le kamupani i nisi o suiga tetele o le a iai aemaise lava i laina e aga’i i Ipswich ma Cleveland ma o loo faaaogā ai pasi e suia ai trains.
Faailoa e le Ofisa Sili o le Queensland Rail i le 9News ua mae’a ona faamālūlū le kamupani i tagata femalagaa’i ona o ia suiga aemaise ua fetaui tonu ma le matāupu e faatatau i le siitaga o le penisini.
Fai mai le Ofisa Sili o loo taumafai i le mafai e gata ai e faaitiiitia aafiaga o nei suiga mo tagata feoa’i ma ua mae’a foi ona aga’i i le Fair Work i le aso ananafi i se taumafaiga e taofia ai solo tetee peita’i e le’i manuia.
Fai mai talu mai Ianuari sa faia ai pea feutana’iga a le kamupani ma le Iuni o tagata faigaluega peita’i ua faaopoopo pea le aofa’i o faaaliga o solo tetee o le a faia ua o latou mauaina.
Ua faailoa e le 9News faamatalaga mai le Iuni e lē o iai se solo tetee ua faia ma o loo sauni tagata faigaluega e aga’i i galuega a taeao ina ia faaauau le auaunaga mo le faaoo o tagata i galuega ma le fanau i a’oga.
Fai mai a latou o nisi la tulaga e ono aafia ai le auaunaga a taeao o loo i le faitalia a le Faigamalo a Kuiniselani.
O loo ta’ua i le lipoti sa fuafua le iuni e faia sā i nisi vaega o le galuega, peita’i ua lapata’i atu le Queensland Rail o soo se tagata faigaluega e auai ai i solo tetee o le a lē maua uma lona totogi.
Puna o Faamatalaga: https://www.9news.com.au/national/queensland-railway-strike-trains-disrupted-across-brisbane/e6739fb2-1c86-4420-8a4d-335f3f89189b
