O le susuga ia Connelly Poutasi o se tasi lea o alo logologoa o Samoa sa iloga le mataina o lana taalo i le taamilosaga o le NRL i lenei tausaga a o taalo ai i le ‘au malosi o le Dolphins. 

Sa fofoa atu lona olaga taalo i totonu o Niu Sila ma faasolosolo atu ai ina maua mai ana sikolasipi mai i kalapu a le West Tiger a Ausetalia lea sa ia see atu ai loa ma faaaogā le avanoa ua maua mai mo ia. 

Sa taalo i le ‘au lona lua a le West Tiger ma faasolo ane loa ina maua lona avanoa e taalo ai i le ‘au numera tasi a le Bulldogs i le lua tausaga, sosoo ai ma le ‘au a le Cowboys seia oo ina se’i atu e le ‘au a le Dolphins lea sa taalo ai loa i lenei tausaga. 

Sa filifilia e le ‘au a le Toa o Samoa i le Ipu a le Lalolagi i le tausaga ua mavae ma sa iloga ai le fiafia tele o nai ona mātua ina ua maua le avanoa e fai ai lona sao mo le ‘au a le atunuu le Toa o Samoa. 

O le tausaga lenei a o loma ai le taamilosaga o le Pacific Championships i le va o Niu Sila, Samoa ma Ausetalia na valaau ai le faiaoga a le Kiwis le susuga ia Michael Maguire ia Connelly Poutasi Lemuelu e maua lona avanoa e taalo ai mo le ‘au a Niu Sila. 

Ae sa tali le susuga ia Connelly Lemuelu se’i tuu atu se taimi e fai ai sana filifiliga ona se’i fesootai muamua mai i ona mātua. 

Sa fesootai mai Connelly Lemuelu i ona mātua ia Konelio Poutasi Lemuelu ma le tina ia Tainoino Lemuelu e tusa ai ma le manaoga o le faiaoga a le Kiwis o loo mananao atu mo ia i le ‘au a Niu Sila. 

Ae tali atu mātua o le atalii, e leai e sau e tautua le ‘au a le atunuu manū o maua lona avanoa. 

Sa talia e Connelly le tali a ona mātua ae teena loa lea valaau atu a le faiaoga a Niu Sila. 

Ma o lea sa filifilia ai loa e le ‘au a le Toa o Samoa i le taamilosaga ua mae’a nei. 

Saunoa le tuaa o Connelly Lemuelu, le tamā ia Konelio Poutasi Lemuelu, e tasi lava lo la alo, ae o mea uma lava i taaloga a lona atalii e muamua lava fesootai mai ia laua mātua poo le ā le mea e fai a o lei see atu i se isi vaega o ana taaloga. 

Ona faapea foi lea ona avatu le tuualalo i lona atalii mo ana taaloga. 

O le laualuga o le manatu o laua o mātua ia fai se sao o le la tama e tautua ai le atunuu e ala i lana ‘au le Toa o Samoa, ma o le ala foi lea e naunau ai e faamalosi le atalii e ofu le laei o le Toa o Samoa auā lana tautua mo le atunuu. 

O Connelly Poutasi Lemuelu e mai le afioaga o Safotu, Salelologa, Luatuanuu ma Falelatai ae ua aumau nei i Ausetalia ona o ana taaloga.