Ua faailoa e le Palemia o Niu Sila Jacinda Ardern i le televise a Niu Sila na ia teena se valaaulia mai le peresetene o Ukraine e asiasi atu ai i lona atunuu. Fai mai Ardern e pei ona faailoa i le lipoti na ia maua le valaaulia e pei lava foi o ta’ita’i o isi atunuu ae sa ia teena ona o nisi o fuafuaga tau faigamalaga ua mae’a faatulaga.
Na faailoa e le Palemia na talosagaina e Ukraine se fesoasaoni ma sa tali iai Niu Sila ma o le a lē suia lea tulaga ona o le lē asiasi atu i laufanua o lea atunuu. O le taimi nei ua aga atu le Palemia mo Spain i le fonotaga a le NATO ma ona ta’ita’i o loo fuafua e auai ai.
A o iai foi i lea faigamalaga o loo fuafua le Palemia e maua ai se maliega tau fefaataua’iga sa’oloto ma le Iuni a Europa ae ua aveina atu foi vaalele Hercules a Niu Sila ma ona ofisa i Europa e fesoasoani ai ia Ukraine atoa ai ma le 30 miliona I fesoasoani ua mae’a tuuina talu mai le amataga o le taua.
