O se ata puupuu poo se documentary na ‘ea i luga o le ala ata o le Netflix i lenei masina ua faaigoaina “Untold, The girlfriend who didn’t exist” ua tele ai tagata ua malamalama i se tasi o mataupu na tulai mai i se alo o Samoa na soifua ane i Hawaii ia Manti Te’o. 

I le sefulu tausaga talu ai na tulai mai ai se mataupu lavelave na matuā afaina ai le olaga taalo o lenei alii talavou o Manti Te’o. E pei ona silafia o lenei alii sa iloga i le taaloga o le American Football i lana aoga i Notre Dame. 

I lea vaitaimi i le tausaga e 2012 sa talatalanoa ai Manti i se tagata e suafa ia Lennay Kekua mulimuli ane avea ma ana uo teine, pau le faaletonu e le’i feiloai lava i laua nei pe vaaitino le tasi le isi. 

Ta’ua i le faasoa a Manti i luga o le Netflix, i le taimi atoa sa feoa’i ai ma Lennay Kekua na te le’i iloa e lē o se tamaitai lea e talatalanoa iai. Ua faasolo ai a lenei mafutaga mulimuli ane maua e Manti le tala ua maliu lana uo teine mai tagata o loo masalomia o tagata o le aiga o Lennay. O se tala faanoanoa tele lea mo le alii taalo, ona o le aso lava na maliu ai si ona tinā matua (grandmother) o le aso foi lea na ia maua ai le tala ua maliu ai foi lana uo teine. 

E ui i nei mafatiaga ae na faaauau le taalo ai o Manti ma momoli uma ai ana taumafaiga i lona tina matua ma lana uo teine, e aunoa ma sona silafia e lē o se tamaitai lea na osi le la faigauo ma talatalanoa iai i lea taimi umi na la masani ai, ma e leai foi se tagata e igoa ia Lennay Kekua. 

Na oo ina faailoa e ofisa faasalalau i Amerika le mataupu lenei i le leai o se tagata e igoa ia Lennay Kekua ma e lē moni uma faamatalaga e faatatau i lea tagata. Mulimuli ane o le tagata e igoa ia Ronaia Tuiasosopo o ia lea sa i tua o nei gaioiga uma. 

Na tele lagona eseese o tagata e faatatau i lenei mataupu. O nisi na misialofa i lenei alo o le atunuu, ona ua avea ona uiga lelei ma le faamaoni ua avaga gofie ai ona lagona alofa i se tagata na mafuta i ai e aunoa ma sona mua’i fesiligia pe faamautinoa le moni o le tagata lea ua la fesoota’i. 

Ae o nisi foi tagata na sa’i ma faapea ane, o ni faufauga pepelo uma na faia e lenei alii o Manti ma le isi tama lea sa faapea o lana uo teine, aemaise o le isi tuua’iga sili ona matagā ma mafatia ai si nei alo o Samoa, ona ua to’atele na manatu o Manti e gay poo se alii e fiafia i ni mafutaga faaulugalii ma se tasi la te itupa tutusa poo se isi lava tama. 

O le faasoa mai ai la a Manti Te’o e ala i le ala ata o le Netflix na faato’ā maimoa ai le to’atele i le itu a Manti ma mea sa tutupu. Sa faasoa ai foi Ronaia Tuiasosopo ma faailoa foi mafuaaga o gaioiga sa ia faia na aafia ai lea alii taaalo. 

O se lesona tāua mo le to’atele i tulaga o tagata e faaaogāina faamatalaga sese e taufaavalea ai ma taufaasese i isi tagata. 

Faailoa e Manti i le faai’uga o lea faasoa, ua ia faamagalo ia Ronaia i ana gaioiga sa faia ia te ia ma o le a faagalo mea ua tuanai ae agai luma mo se manuia o ia ma lona aiga.