Ua taunuu uma nei faauluuluga ma faaao o malo o le Taupulega ma latou usugafono mo le amatalia o le fono autū a malo o le Taupulega o le a tatala i le malelega mai le Tupu o le malo o Peletania tele, le afioga Tui Taumeasina Salesa III, i lona tulaga o le faauluuluga o malo uma e 56 o le Taupulega.
O le faletaalo le Multipurpose Gym i Tuanaimato lea sa tauaofia ai foi le fono a ta’ita’i o malo Aferika, Kerepeane ma le Pasefika na sainia ai i le tausaga na te’a nei, le maliega ua faafou a ia malo ma le iuni a Europa ua faaigoaina o le Samoa Agreement.
O le mae’a ona tatala aloa’ia o le fonotaga i lea nofoaga, o le a see atu ai taualumaga uma o le fono lona 75 a malo o le Taupulega e faagasolo i le maota fono o le Palemene i Mulinuu.
O le Aso Toonai le aso mulimuli o le fono o le a see atu ai i le faletalimalo o le Sheraton Aggie Grey i Mulifanua, lea o le a faia ai le mafutaga poo le retreat a ta’ita’i uma o malo e 56, ma faai’u ai i le feiloa’iga ma le vasega o tusitala ma le aufaasalalau.
O se feiloa’iga o le a faailoa ai nisi o i’ugafono o le a malilie iai ta’ita’i o malo o le Taupulega.
