Ua taunuu le uluai palau e alu i le eletise a Niu Sila.
O le faatoaga cherry i Central Otago lea ua taunuu iai le palau e pei ona aumai ai mai Amerika.
O le aso a taeao o le a faia ai le sauniga e faalauiloa aloaia ai ma o le a auai atu iai le minisita o suiga o le tau, Jame Shaw faapea le minisita o le siosiomaga Rachel Brooking.
E $89,000 tala Amerika tusa lea ma le $142,000 tala Niu Sila le tau na faatau mai ai ae ese ai le tau o le tiute, lea e uma ane lava ua latalata i le $200,000 tala.
Mai pule o le faatoaga ua faatauina mai le uluai palau e alu i le eletise a Niu Sila, e le gata o le tele o le tupe faasao mai le tiso auā o lea e toe fafaga le malosiaga o le palau mai le eletise maua mai le la poo le solar system e tusa lea ma le na o le $5, ae e le tau moomia foi se tagata faigaluega o se avepalau auā e mafai ona faatonutonu e le palau ia lava.
Ae mai nisi o le au faitogalaau’aina faapea faifaatoaga, e foliga mai o le toatele o i latou e le o iai se fuafuaga e fia vave sui agai i palau e alu i le eletise.
