O lea ua taunuu mai i laufanua o Ausetalia le Palemia o Initia, Narendra Modi mo se feiloaiga ma le Palemia o Ausetalia ma ua fuafua o le a atili vavalalata ai le mafutaga a atunuu e lua.
O loo tapena lava foi tagata Initia i le atunuu ia latou polokalame e faafeiloai aloaia ai le latou alii Palemia i le taunuu mai ai i Ausetalia.
O le a faia faatalanoaga i mataupu tau fefaataua’iga, puipuga ma isi mataupu.
O le a auai la Palemia e lua i se sauniga a le komiuniti e faia i le Sydney Olympic Park i le po ananei ma e silia ma le 20 afe sui o tagata Initia i Ausetalia o le a auai ai.
O le atunuu o Initia o se tasi o atunuu e telē le tamaoaiga i le lalolagi ma ua fuafua o le a atili faamalosia ai le mafutaga i le va o atunuu e lua i le malaga mai o Modi, o lana malaga mulimuli mai i Ausetalia o le 2014 ma ua nofosauni le komiuniti o tagata Initia i Sini e feiloai atu i lo latou taitai ma faatino foi nisi o a latou tu ma aga e faafeiloai aloaia ai o ia.
