Ua tali se faalapotopotoga o tama ma teine talavou mai le malo malosi ma mauoloa o Meleke poo Amerika, i le vaivai o tupe maua a le a’oga tulagalua a afioaga o Saina ma Toamua i le itumalo o Faleata, o le a fausia ai ni potu a’oga tetele se lua e faaopoopo i potu o le faleaoga o loo iai, ona ua toatele fanau ae vaapiapi avanoa mo le faatinoina o a latou a’oa’oga.
O le Aso Gafua na feiloai atu ai le Pule aoga, o faiaoga ma fanau faapea sui o le komiti i le aumalaga e lata i le toa luasefulu o tama ma teine talavou mai Amerika o le a latou faatupe le fausia o lea galuega.
Faaalia e se sui o le aumalaga ua le manao e faailoa lona suafa ona o nisi o aiaiga o le faatinoga o le latou fesoasoani, e faatoa faailoa uma faamatalaga o le mafuaaga o le foai ma i latou ua tauala mai ai seleni e faatupe ai, pe a mae’a ona fausia potu aoga tetele e lua i le masina o Aokuso o le tausaga nei.
O le aoga tulagalua a Saina ma Toamua o se tasi o aoga tu lata i le taulaga peitai ua faaalia e se sui o le komiti le tofa Ale Vena Ale, o loo saili fesoasoani i le toe faaleleia o le faleaoga ma le hall e lei mae’a.
O loo iai se isi fesoasoani ua tali mai iai le Malo o Iapani, i le faamoemoe e toe fausia ai le faleaoga atoa o se tasi o faleaoga o fausaga tuai o loo faaaoga ai laupapa.
